Lesbos

Inor ez da irla,
inor ez da bakar:
kasik ziurrago 
artxipielago...
 
Irla ez den gizon-
emakume asko
irlarantz badatoz,
ez da irlatzeko.

Nekeak itota
ez da lo lasaia:
krudela denean,
ez deitu bidaia... 

Haurra haur da beti
eta harria harri,
nahiz eta bularretik
ozpina edoski.

Koordenada bat
gerraren zedarri,
mugan sokasaltoan
dira ibili…

Lokarria, soka,
dardar eta oka:
ukabilak joka
hesteetan kolpa...

Heste bat, beste bat,
eta heste mila:
hau liseritzerik
balego bezala.  

Begiak, ordea,
nork bereak dauzka:
berde, urdin, arre, 
itsasoko more.

Lesbos uhartean
ere gure gisa,
baina gehitu horri
txarrantxaren isla.

Itzulika (Batera ekoizpenak, 2017)